Takorabt.net
Le nouveau site du Village Takorabt
Abrid Abrid par: Hmed Lehlu
Hmed Lehlu
- AMSEBRID
Hattah tmurt-ik
Hatni watmaten-ik
Haqel-ak gar-aneɣ telliḍ
Wagi mačči d asefru
Mačči d aman isemaḍen
Ger ccetwa d unebdu
Ajrad yeɣli-d ɣef ijeǧǧigen
Ay iṭij deffir wagu
Nemseεraq ger yemsewqen
Truḥeḍ ay amdakel-inu
Ar ass-a ur k-ẓrant wallen
Ur tenziḍ ur tunizeḍ
Ur terxiseḍ ur teεfiseḍ
D azal-ik iɣef teɣliḍ
Zdat ṭlam ur tessarameḍ
D tafat i tessarameḍ
D aẓɣal neɣ d asemmiḍ
tezgiḍ di tidet tzerrεeḍ
S yidamen almi i tt-tessweḍ
Deg Tudert Lebda Telliḍ
Ddaw n wakal testeεfayeḍ
Ay amdakel ur temmuteḍ
Deg ul-iw mazal telliḍ
Wagi mačči d asefru
Neɣ d aεwin n yimsebriden
Mačči d tafawet n uɣurru
Neɣ d tafunast n yigujilen
Ger tjeǧǧigt d uferteṭṭu
Neɣ d tayri i si mḥemmalen
Uqbel ad d-yaweḍ unebdu
Uqbel ad msefraqen
Truḥeḍ ay amdakel-inu
Tamεayt-ik teqqim akken
Γur-i d kečči i d asefru
Mel-asen-d amek ara tt-fakken
Tḥammleḍ win ik-yebɣan
Tḥammleḍ win ik-yeǧǧan
Tḥammleḍ win ur k-nessin
D ayetma-k medden akken llan
Ul-ik anect n yigenwan
S tayri i d-teqqareḍ amin
Tleḥḥuḍ ɣef yizerfan
Ur tleḥḥuḍ am yizerman
Ur tettdariḍ tiγaltin
Mačči d akal i d ak-rran
Ara ad k-yekksen ger wid yellan
Yak tidet tugar limin
.
Wagi mačči d asefru
Seg tizi n ttexmam akkin
Talwit ad tekker d waḍu
Lexdeε d lbaṭel ad rgagin
Deg yigenni ad yenser wagu
Ad d-yali yiṭij yeγlin
Akken ara ad yendah usefru
Kečč ad tḍeggred timedlin
Amsebrid ad yekker ad yelḥu
Ad d-iban ger tγaltin
Akken i t-nura deg usaru
D ayen yuran ara ad d-yilin
Ad nenger wala ad neknu
Ay amdakel-iw steεfu din
Wagi mačči d asefru
Mačči d tuγmas i yettruẓu
Mačči d ayen iyi-ibeεden
Asγar-is ur irekku
Ur ittγar ur ilemmu
Ur tessefsayen iḥeddaden
Ur ittḥar ur ittkukru
S yimal iṛeqq, igemmu
Ur tesserwayen ara isafen
Tafat ur as-tt-iteffer wagu
Afriwen-is ttawin-d aḍu
Yessawal-d i yiγriben
Fehmeγ-k ay amedakkel-iw
Anda telliḍ steεfu
D amennuγ-yesefraḥen
Mačči d asefru neγ d lemεun
Uγalen yiḍarren ar uqelmun
Ger tmazγa d yemnaren
Waγzen yedduri-d leqrun
Uglan undin ttrajun
Ar tlelli win ara ad d-yeccḍen
Mačči d azrem n uqelmun
Neγ d amqerqur n umdun
Win izerεen idammen
Ger wewtul akk d ufekrun
Lḥeq mačči d aserdun
Amennuγ-nneγ yiwen
Iṛebbiten-agi ad d-knun
Ala tafat ara ad d-yejbun
I mi γef yidra-s i d-leddint wallen
Wid yeffuden kra ad t-ṛwun
Mačči d asefru neγ d lemεun
Ay arezg n win iṣebren
Yes-k ferḥeγ ma madden ttrun
Ur zmiren ara ad k-ttun
Fell-ak cebḥen lehdur-nsen
Hatta tmurt-ik
Hatni watmaten-ik
Haql-ak gar-aneγ telliḍ
Wagi mačči d asefru.